Суд вызначыў 3 гады калоніі для Дзмітрыя Семчанкі

Напярэдадні прадстаўніца пракуратуры запатрабавала прызнаць былога тэлепрапагандыста, кіраўніка прэзідэнцкага пула журналістаў вінаватым у «наўмысных дзеяннях, накіраваных на ўзбуджэнне сацыяльнай варожасці і варожнечы па прыкмеце сацыяльнай прыналежнасці»і на падставе ч. 1 арт. 130 Крымінальнага кодэксу прызначыць яму пакаранне ў выглядзе 3 гадоў пазбаўлення волі ў калоніі агульнага рэжыму. 

«Кіруючыся прынцыпам індывідуалізацыі пакарання, беручы да ўвагі, што ўчыненае злачынства адносіцца да замаху супраць міру і бяспекі, а таксама характарыстыку асобы абвінавачанага, мэты крымінальнай адказнасці, а менавіта выпраўленне асобы, якая ўчыніла злачынства, і папярэджанне ўчынення іншага злачынства, будуць дасягнуты пры назначэнні Дзмітрыю Семчанку меры асноўнага пакарання ў выглядзе пазбаўлення волі», – аргументавала чыноўніца нагляднага ведамства. 

23 сакавіка суддзя Мінскага гарадскога суда Яўген Пісарэвіч не знайшоў аргументаў, каб запярэчыць боку абвінавачвання, і прадубляваў прапанаваны тэрмін у поўным аб’ёме. Такім чынам, працэс заняў усяго тры дні, увабраўшы ў сябе допыт фігуранта, спрэчкі бакоў і вынясенне прысуда. Аргументы юрыдычнай абароны адносна таго, што Дзмітрый Семчанка можа «загладзіць віну»іншым спосабам, знаходзячыся на волі, суд праігнараваў. Як і тое, што сям’я гадуе маленькага сына.   

Ад канца 2022 года Дзмітрыя Семчанку ўтрымліваюць у следчай турме № 8 Жодзіна. Узяцце пад варту Генпракуратура тлумачыла тым, што цягам працяглага часу фігурант праз тэлеграм-каналы і чаты «фармавааў у  грамадскасці варожасць і нянавісць да супрацоўнікаў праваахоўных органаў, ваеннаслужачых і прадстаўнікоў улады». Ранейшыя заслугі аблашчанага ўвагай палітычнага аглядальніка пад увагу не браліся.  

Першапачаткова Дзмітрыя Семчанку і ягоную жонку Юлію, таксама дыпламаваную журналістку, затрымалі 15 верасня 2022 года за «рэпосты з экстрэмісцкіх тэлеграм-каналаў». Паколькі сям’я выхоўвае непаўнагадовага сына, маці абышлася адміністрацыйным штрафам, а Дзмітрыя арыштавалі на 15 сутак — з новай фармулёўкай «за хуліганства». 

У вызначаны тэрмін Дзмітрыя Семчанку на свабоду не выпусцілі, на яго склалі новы пратакол з наступным адміністрацыйным арыштам «за распаўсюд экстрэмісцкіх матэрыялаў». Пазней стала вядома, што супраць журналіста пачалі крымінальную справу на падставе ч. 1 арт. 130 Крымінальнага кодэкса. 

Праваабарончая супольнасць прызнала Дзямітрыя Семчанку палітычным вязнем. 

Цягам 2009–2020 гадоў у якасці спецыяльнага карэспандэнта, а пасля палітычнага аглядальніка Дзмітрый Семчанка працаваў на тэлеканале АНТ. Ён пераможца прафесійнага конкурсу «Тэлевяршыня», лаўрэат шматлікіх прэмій сярод прадстаўнікоў дзяржаўныя СМІ. За сукупнасць заслуг атрымаў давер узначаліць «прэзідэнцкі пул» з найбліжэйшага медыйнага атачэння Аляксандра Лукашэнкі.

Аднак у жніўні 2020-га публічна асудзіў беспрэцэдэнтную жорсткасць сілавых структур і на знак пратэсту звольніўся з тэлеканала. Неўзабаве па яго прыйшла «група захопу», дома зладзілі ператрус. Следам суддзя Фрунзенскага раёну Юлія Блізнюк пакарала былога тэлевядоўцу 15 суткамі арышту паводле «народнага» артыкула 23.34 КаАП («удзел у несанкцыянаваным масавым мерапрыемстве»ды яшчэ падчас працы ў дзяржаўнай установе). 

У канцы 2020 года Дзмітрыя Семчанку запрасілі на пасаду піяр-менеджара ў кампанію «Белагра», якая займаецца продажам беларускай сельгастэхнікі і запчастак. А летась сілавікі практычна разграмілі фірму за тое, што там знайшоў прытулак «здраднік рэжыму». 

Чытайце яшчэ:

Прадстаўніца АБСЕ па пытаннях свабоды слова і іншыя еўрапейскія палытыкі выказаліся ў падтрымку беларускіх журналістаў-палітвязняў

«Ці вырашыла з ліквідацыяй TUT.BY і іншых незалежных медыя дзяржава хоць адну праблему?» Марына Золатава — беларусам пра Беларусь

Патрэбна дапамога сям’і Сяргея Сацука, палітвязня журналіста-расследавальніка